告別17

今日心血來潮, 見屋企o個pack試用裝相紙就黎用晒, 就想去買番pack黎玩下, 去左天悅, 見到d相紙, 揀左包唔係太平又唔係好貴既相紙, 見佢38蚊廿五張, 呀老細話都幾好, 諗住試下啦.. 點知番到黎, 唔知係我用開canon既相紙太靚定係呢包野唔知係咩..一打開我淨係見到成疊卡紙咁, 都唔可以話係卡紙, 因為都幾薄下, 再睇下佢個封面寫住"光面相紙", 下.. 都.. 都有少少光既..咪比起包裝用既卡紙光少少少少咁囉.. == 點都唔值三十八蚊呀?? 萬二分無奈.. 好似比人呃左咁.. 算! 我以後去logon買.. 唉..

弊.. 個計劃好似失敗左喎.. ><"""

仲有幾個鐘頭就要告別我既十七歲喇.. 唉!! 我要買六合彩!!

今日我拎住一個十蚊銀一個五蚊銀同一個一蚊銀o係六樓諗野, 俾左d啟發我.. 拿. 我手上有三個銀仔, 下面球場有一堆人, 我掟個銀仔落去.. 最唔痛既係一蚊銀啦.. 但係最痛既唔係十蚊喎.. 係五蚊喎.. 因為五蚊重d.. 咁即係話, 一件野既價值, 同佢既影響力, 有時都唔係成正比架.. 正如一個人, 可能身無分文, 或者係點差都好, 但係佢都可以做大事, 而就算係好有錢, 都唔一定係個大事既人. 我又諗, 佢地有唔同價值, 唔同大小, 但係, 我買唔同野既時候, 我又唔一定用最大既, 又唔一定用最細既, 例如我去m記買杯細汽水, 五蚊我就會俾五蚊銀, 去學校對面買個雙拼飯十四蚊我會俾十蚊銀同五蚊銀, 但係如果我俾晒三個銀仔, 老闆就會俾番個一蚊我同我講話多左, 仲可能會話你中幾呀仲唔識計數.. 咁即係話.. 其實每樣野或者人都有唔同既用處, 唔會話冇用, 應該向住o個樣野既專長去發揮, 夾硬咁用反而會有反效果.. 嘩.. 咁樣都吹到咁多字我中化個人短講得呀今次..